ငယ်ဆရာ (၁)

မဆုံးနိုင်သော သင်ယူခြင်းတွေနဲ့..အမြဲတမ်း အသစ်အသစ်တွေ သင်ကြားနေကြရတဲ့..ကနေ့ ခေတ်ကြီးမှာ..သင်ဆရာ..မြင်ဆရာ..ကြားဆရာတွေက..များပဲ များလွန်းလှ ။ အဲဒီ သင်ကြားခြင်း မျိုးစေ့ တွေ စတင် အညွန့်ညောင့် အပင်ပေါက် ခဲ့တဲ့.. ငယ်ငယ်တုန်း က..ပျိုးခင်း..ယာခင်း ကျောင်းစာသင်ခင်း ကြီးတွေ ကိုလည်း လွမ်းမိပါ့..။ တွေ့ခဲ့ ဆုံခဲ့ရတဲ့.. ငယ်ဆရာတွေ ကို လဲ..ပြန်ပြန် သတိရ..။
အဲဒီ စိမ်းမြနေတဲ့.. ပညာပန်းခင်း ကြီးတွေထဲမှာပဲ .. ရွှင်မြူး ပုံရိပ်တွေ စွဲထင်ခဲ့..အမြဲအမှတ်ရ ကျေးဇူးတွေလည်းတင်ခဲ့.. နာကျင် အပွန်းအပဲ့တွေလည်း ရခဲ့...။

ကျဲကျဲလေးရဲ့ဘလော့က..ပန်းချီ

ဆယ်ပြားစေ့ ၂စေ့ နဲ့ ဆရာ

ဆိုရှယ်လစ် ခေတ်နှောင်းမှာ ကြီးပြင်းခဲ့သူမို့.. ခဏခဏ ပြောင်းလဲ နေတဲ့..ပညာရေး စနစ်သစ်တွေနဲ့ ...အမြဲလို ပက်ပင်း တိုးရင်း အစမ်းသပ်ခံ စာသင်ခန်းတွေ နဲ့ တောက်လျှောက် ဆိုသလို..။ ဦးနေ၀င်းကြီးရဲ့ လမ်းညွှန်မူ အသစ်နဲ့.. အရင် ၅ တန်းမှာ အင်္ဂလိပ်စာ စသင်ရာကနေ..မူလတန်း ကျောင်း ကတည်းက..စသင်စေ လို့ ပြောင်းလိုက်တော့..ကိုယ်က..လေးတန်း ..။

အဲဒီတုန်းက..လေးတန်း တတန်းလုံးကို ဆရာတယောက်ထဲက..ဘာသာစုံ သင်တာပါ။ လေးတန်းကိုင်တဲ့ ဆရာ သုံးတန်းကိုင်တဲ့ ဆရာမ အဲဒီလိုမျိုး။ လေးတန်းဆရာက..သူ့ကိုယ်ပိုင် စီးပွားရေးလဲ ရှိတော့..တခါတခါ ဆို.. ကျောက်သင်ပုန်းမှာ စာတွေ အပြည့်ရေးခဲ့ပြီး..ဟိုဖက်ခန်းက.. ၂ တန်းဆရာမ နဲ့ အတန်းကို အပ်ပြီး ထွက်ချင် ထွက်သွား တတ် တာ ။ A-B-C-D ပြီးလို့..Apple (အပ်ပဲလ်) ပန်းသီး ဆိုတဲ့ သင်ရိုး တွေလဲ ကုန်ပြီ။ ညနေဖက် ပိုနေတဲ့ ဖွံ့ဖြိုးချိန်တွေမှာ...အင်္ဂလိပ် ကဗျာ တွေ ဆိုကြရတယ်။ အဲဒီ အချိန်ဆို..ဆရာက.. မွန်းမံသင်တန်းက ပေးလိုက်တဲ့ ကက်ဆက်ခွေ နဲ့ ကဗျာတွေ ဖွင့်ပေးထားပြီ.. ဆယ်ပြားစေ့ ၂စေ့နဲ့ မုတ်ဆိတ်မွေး နှုတ်နေတော့တာပဲ။

one- two.. buckle my shoe..
there , four.. shut the door
five, six.. pick up sticks
+++++
row..row ..row your boat
gently down the stream,
+++++

တခန်းလုံးက..ကလေးတွေက.. သံကုန်လွှင့် ပြီး .အော်ကြ..ပျော်ကြ တဲ့ အချိန်မှာ ကိုယ်တယောက်ထဲ..ပါးစပ်ကြီးပိတ်လို့...။
တခန်းလုံးက..သူငယ်ချင်းတွေ အားလုံးက.. ညနေဆို..ဒေါ်လေးကြီး ကျူရှင်တက်ကြတော့.. ကဗျာတွေ..အားလုံး ရပြီးသား ကိုး ။ ဆရာကလဲ..သိနေတော့..အပင်ပန်းခံပြီး ရေးမပြ..သင်မပြ..ရှေ့က..ချမပြ တော့ဘူး။ ကျူရှင် ဆိုတာကို လက်မခံ လို့ သားသမီးတွေကို ကျူရှင်လုံးဝ ပေးမထားတဲ့ ဖေဖေ့ ကြောင့်..အဲဒီ ကဗျာ ချိန်ဟာ ကိုယ့်အတွက်တော့.. စိတ်လဲ တို ၀မ်းလဲ နဲရတဲ့.. ညနေစောင်း တွေ ဖြစ်ခဲ့ရတာ..ခုထိ အမှတ်ရ နေခဲ့တယ်။ ဒေါ်လေးကြီး ကျူရှင်ကို တက်ချင်လိုက်တာ ဆိုတာလဲ မပြောပါနဲ့တော့။ ခုထိ.. မြို့လေးကို ပြန်ရောက်တိုင်း.. ဒေါ်လေးကြီး တို့ ရှိသေးလား အမြဲ မေးရတယ်။ အဲဒီ ဆယ်ပြားစေ့ ၂စေ့ နဲ့ ဆရာ ကိုတော့.. ပြန်ကာနီးတိုင်း သူ့ဆိုင်လေး မှာ..၀င် နှုတ်ဆက်ဖြစ်တယ်။ ကိုယ့်ရဲ့ငယ်ဆရာအစစ်ပါ။

ဥယျဉ်မှူး ဆရာ

၅ တန်းကို ရောက်တော့.. အရင် မူလတန်းကျောင်းလေးကနေပီး..မြို့ပြင်က..ခန့်ညားလှတဲ့ အထက်တန်းကျောင်းကြီးမှာ စတတ်ရတာမို့ စိတ်တွေ တအား လှုပ်ရှားလို့။ ကိုယ်တို့ အခန်းလေးက.. အီးပုံစံ ကျောင်းဆောင် အဆွယ်လေး တခု ရဲ့ အစွန်ခန်းလေး။ ခုထိ မှတ်မိတယ်။ ဘေးက အဝေးပြေးကားလမ်းမကြီး ပေါ်က..ကားသံတွေ တ၀ီဝီနဲ့။ အတန်းပိုင် ဆရာက..သချာင်္ပြတယ်။ ဆရာ့မှာ ထူးခြားတာက.. `မင်္ဂလာပါ ဆရာ´ နှုတ်ဆက် တာကို အရမ်း အလေးအနက် ထားတယ်။ ထိုင်မလို ထမလို လုပ်ပြီး ပြီးစလွယ် နှုတ်ဆက်တာမျိုးကို လုံးဝ မကြိုက် ။ သူကိုယ်တိုင်လဲ.. အတန်းရှေ့က..သေချာရပ်.. အားလုံးကို မြင်အောင်ကြည့်ပြီးမှ..` မင်္ဂလာပါ တပည့်တို့ ´ လို့ ပြန်နှုတ်ဆက် လေ့ရှိသည်။ ပြီးတော့..အတန်းသား အာလုံးကို ရွှေဒင်္ဂါး ပန်း ပျိုးပင်လေး တွေ တယောက် တပင်စီ ပေးပြီး.. အပြင်ကို စွန်ထွက်နေတဲ့..အခန်း ပတ်ပတ်လည်မှာ.. တန်းစီပြီး စိုက် ခိုင်းတယ်။ ကိုယ့်အပင်မှာ နံမယ်လေးတွေ..အမှတ်အသားလုပ်ပြီး.. ရေလောင်း ပေါင်းသင် ပြုစု ရတယ်။ အဲဒီ တုန်းကဆို.. ၅ တန်း အတန်းပတ်လည် အားလုံးက..ဘုရားပန်းအိုးတွေမှာ ၅တန်း (အေ) က ပွင့်တဲ့ ရွှေဒင်္ဂါးပန်း တွေနဲ့ ဝေ နေခဲ့တာပေါ့။

အဲဒီလို ဂါရဝေါစ ရိုသေလေးစားခြင်း နဲ့ တာဝန်ယူတတ်မူ ကို ပျိုးထောင်ပေးခဲ့တဲ့..ဆရာ့ ကို ခုတခေါက်ပြန်တော့.. ပင်စင်ယူပြီး..မြို့လေးမှာပဲ ဘော်ဒါကျောင်းလေး ဖွင့်ထားတာ တွေ့ခဲ့ရတယ်။ သမီးလေးက..ဆေးကျောင်းတက်နေပြီး..ဘီအီးဒီ ဆင်း သားကြီးက.. ဆရာနဲ့အတူ ဘော်ဒါ ကျောင်းသားတွေကို သင်ကြား အုပ်ချုပ်နေတာ တွေ့ခဲ့ရတော့.. ကြည်နူး ပီတိ ဖြစ်မိတယ်။

ဆရာ့ကို ၀င် နှုတ်ဆက်ဖို့..သူတို့ ဘော်ဒါ ကျောင်း ဖွင့်ထားရာ အိမ်လေး ရှေ့... ရောက် သွား ခဲ့တုန်းက....
` ပဉ္စဂုဏံ အဟံဝန္တာမိ ပါ .. ဆရာကြီး´ ဆိုတဲ့ အထဲက ဟိန်းထွက်လာတဲ့ အသံကြောင့်.. ခြေလှမ်းတွေ ရပ်တန့်ရင်း.. ခြံရှေ့က.. ပန်းပင်လေးတွေကို ငေးကြည့်နေခဲ့မိတယ်။

မြန်မာစာနဲ့ ခွဲမရတဲ့ ဆရာမ

အဲဒီ နှစ်က.. ၇ တန်းပတ်လည် ဆရာတွေ အားလုံး စာသင်ကောင်းတယ်လို့ ..နံမယ်ကြီးတယ်။ အဲဒီတုန်းက...`တို့ကျောင်းသား´ စာစောင် မှာ တနိုင်ငံလုံး အတိုင်းအတာ နဲ့ ဖိတ်ခေါ် ကျင်းပတဲ့ မြန်မာစာစီစာကုံး ပြိုင်ပွဲ တွေကို သတ္တမတန်းက..စ ၀င်လို့ ရပြီမို့.. သူမကို မြန်မာစာဆရာမ တယောက် အနေနဲ့.. ၇ တန်းနှစ်မှာ ကြုံခဲ့ရတာ..ကိုယ်တို့ သိပ်ကို ကံကောင်းခဲ့တာပါ။ ကိုယ်တို့ ဆိုတာ.. အဲဒီတုန်းက..မြန်မာစာ အရေးကောင်းတယ်လို့ ဆရာမ ရွေးချယ်ထားတဲ့ လက်ရွေးစင် ကျောင်းသား ၃ ယောက်လောက် ရှိတယ်။ တယောက်ကတော့.. ၀တ္တုတွေဘာတွေ မဂ္ဂဇင်းတွေမှာ ခဏတဖြုတ်ပါလာပြီး..ခုတော့.. အင်္ဂလန်မှာ မိသားစု တာဝန်တွေ ပိနေပုံ ရတဲ့.. သူငယ်ချင်း ရယ်.. နောက် ..ကဗျာတွေ အရေးကောင်းတဲ့.. သူငယ်ချင်းတယောက်ရယ်.. ကိုယ်ရယ်ပေါ့။ ဆရာမ က အမြဲပြောတယ်။ မင်းက..၀ါကျ ရှည်တွေ နဲ့ အဖွဲ့အနွဲ့ ကောင်းတယ်.. ကေ ကတော့.. ၀ါကျတိုတွေ နဲ့ ရှင်းလင်းတယ်။ ဟို ကောင် ကတော့..ငယ်ငယ်လေးထဲက..ကဗျာဥာဏ် ရှိတယ်.. အဲဒီလို ခွဲခြားသုံးသပ်ပြီး.. ပြုစု ပျိုးထောင်ပေးခဲ့တာ။ ဒါပေမဲ့..`တို့ကျောင်းသား´ က လစဉ် ခေါ်တဲ့ ပြိုင်ပွဲ ခေါင်းစဉ်တွေကိုတော့ .. တတန်းလုံးကို ပေးရေး ခိုင်းပြီးမှ ..အကောင်းဆုံး တခုကို သူကိုယ်တိုင် တံဆိပ်ခေါင်းဖိုး အကုန်ခံပြီး..လတိုင်း ရန်ကုန်ကို ပို့ပေးတတ်သူ။ တို့ကျောင်းသားကလဲ..တနိုင်ငံလုံးက လာတဲ့ စာတွေထဲကမှ အကောင်းဆုံး တခု ကို သရုပ်ဖော်ပုံ နဲ့ အပြည့်အစုံ ဖော်ပြပေးပြီး.. နှစ်သိမ့်ဆု ၁၀ ခု လောက်ကို တော့ နံမယ်နဲ့ အတန်း..ကျောင်း တွဲပြီး ဖော်ပြပေးတယ်။ ၇ တန်း ကနေ ၁၀ တန်းထိ တန်းခွဲ မထားပဲ ရောပြိုင်ရတာ ဆိုတော့..မလွယ်လှပါဘူး။ အဲဒီ တုန်းက..အမြဲ လို ဗိုလ်ဆွဲ.. ပထမ ရ ဖော်ပြ ခံရတဲ့ အတန်းကြီး ကျောင်းသားကြီးတွေ ဖြစ်တဲ့..မောင်လွဏ်းဝေ .. မောင်လွဏ်းဆွေ ညီအကို နဲ့ မြရတနာစိုး..မြကြေးမုံစိုး..ညီအမ အတွဲ ကို ခုထိ မှတ်မိ နေမိတယ်။

၇ တန်းကျောင်းသူ ဂဂျိုးဂဂျောင်လေး ဘ၀နဲ့.. နှစ်သိမ့်ဆု နံမယ် စာရင်းထဲတော့.. ၂ ခါလား ပါခဲ့ဖူးပါတယ်။ ဆရာမရဲ့ ကျေးဇူးတွေပါပဲ။ ပါလာရင်လည်း စာအုပ် ထွက်ထွက်ခြင်း ဆရာမက..အရင်ဝယ် ပြီး.. စက်ဘီး နဲ့ အိမ်အရောက် လာပြတတ်တာ။ သူက တောင် ပို ၀မ်းသာနေတတ်တာ မျိုး။
ဖူးဖူးညွှန့်ညွှန့် ပြုသာ ပြင်သာ တဲ့ အရွယ်မှာ မြန်မာစာ လက်ရေးလှ နဲ့ အဆွဲ အချ တွေကိုလည်း နည်းမှန် လမ်းမှန် ဖြစ်အောင် စိတ်ရှည်ရှည် သင်ကြားပေးခဲ့ တဲ့ ဆရာမ။ သတ္တမတန်း သင်ရိုးဖြစ်တဲ့..ဇာတက ပြဇတ် တွေ ဆိုရင်လည်း.. အသစ်မတက်ခင်.. ကြိုပြီး အိမ်မှာ ဖတ်ခဲ့ရတယ်။ အတန်းထဲ ရောက်မှ..အလှည့်နဲ့ စင်ပေါ်တက်ပြီး.. ကိုယ်နားလည်သလို.. အတိုချုံး ပြန်ပြော ပြ ခိုင်း ။ ပြီးတော့မှ.. သူက..အဲဒါကို ဆက်ပွားပြီး သင် တော့.. မှတ်မိ စေတာရော.. အတန်းတွင်း ပါဝင်မူရော.. ထုတ်နုတ်ဖော်ပြတတ်တာရော..ပြောရဲဆိုရဲ ရှိစေတာရော.. အကုန်လုံးကို တပြိုင်တည်း ရစေတဲ့.. သင်ကြားနည်း မို့.. အခု ပြန်တွေးတိုင်း..ဆရာမကို မချီးကျူးပဲ မနေနိုင်ဘူး။

ဆရာမက.. လူမမယ်သမီးလေး ၃ ယောက်နဲ့ ငယ်ငယ်ရွယ်ရွယ် မုဆိုးမ တယောက်ပါ။ ဒါပေမဲ့..သူ့ကို ကြည့်လိုက်ရင်..အမြဲသပ်ရပ် လန်းဆန်း နေပြီး.. အလုပ်အပေါ်မှာ အာရုံ အပြည့်။ သူ့ဘ၀ အပူ တွေကို ဘယ်သူမှ မမြင်ရဘူး။ သူ ကိုယ်တိုင်က..ကဗျာတွေ နဲ့ပျော်မွေ့တဲ့ ကဗျာဆရာမ တယောက် မို့လား မသိ.. စကားပြောရင်လဲ နူးညံ့ပြီး လောကကြီးကို အကောင်း မြင်အောင် ပဲ ကြိုးစားလေ့ရှိတယ်။

မြို့လေးကို ကိုယ်ပြန်ရောက်တိုင်း အဦးဆုံး မပျက်မကွက် သွား ရောက် နှုတ်ဆက် ကန်တော့ ဖြစ်တာကတော့..ကိုယ်တို့ရဲ့ ချစ်လှစွာသော မြန်မာစာ ဆရာမပါပဲ။ ခုဆို ပင်စင်ယူပြီးစ မို့..ထုံးစံ အတိုင်း စီးပွားရေး ခက်ခဲ ပေမဲ့.. သူချစ်တဲ့ တပည့်တွေရဲ့ သားသမီးတွေကို မြန်မာစာ ကျူရှင် ပြန်ပြရင်း..သူ ချစ်တဲ့ ကဗျာလေးတွေ စပ်ရင်း.. သူချစ်တဲ့ မြန်မာစာ နဲ့ အတူ..ရောင့်ရောင့် ရဲရဲ ..မခွဲမခွါ ရှိနေသေးတာ.. ၀မ်းသာစရာ။

( မြန်မာစာနဲ့ ခွဲမရခဲ့တဲ့ မြန်မာစာ ဆရာမ အတွက် သူ့တပည့် ..ကိုယ့်သူငယ်ချင်း ကဗျာဆရာ စပ်ထားတဲ့ ကဗျာလေး ...` ငါတို့ဆရာမ ´ တဲ့။ )

◦

ငယ်ဆရာ (၁)